دئدیلر سانكی منه پان توركم!

من دئدیم سهو ائله دیز خان توركم

ائلیمین دوشمنینه اوخ سونگو

ائلیمین دوستونا من جان توركم

شانلی تاریخیم اولوب كئچمیشده

ائله­ین دونیانی حیران توركم

گون به گون شانیم اوجالماقدادی چون

شانلی دورانه گیرن شان توركم

منه جان جان دئیه­نه جان جان تورك

منه قان قان دئیه نه قان توركم

دایم انسانلیق اولوب آمالیم

انسانا سایقیلی انسان توركم

دده­مین اوغلویام ایلكین گوندن

دده­می من تانیاندان توركم

منه یولسوز دئمه­سین یولسوزلار

یولوم آیدیندی من اعیان توركم

بیر گون اولدومسا سومئر، بیر گون ماد

من اورارتو ایله مهران توركم

بیر گون ایلامدا من اولدوم مدنی

ماننایام قوتتی­یم اشكان توركم

اسلامین بیر زامان اولدوم قیلیجی

اسلاما جارچی مسلمان توركم

منه یولسوز دئیه نه ذولفقارام

سالارام مولكونه طوفان توركم

سلجوقام غزنوی یم من صفوی

افشارام درك ائله شیروان توركم

پارچا پارچا اولور آذربایجان

سانكی من بوردا سیخیلقان توركم

خوراساندان قوما، قومدان خلیجه

اصفهان شوش طبرستان توركم

لوت كویرینده سوسوز قالسام دا

بیر یاشیل اؤلكه­ده گیلان توركم

كرمان اولموشدو منه تورك وطنی

چارماحال ایله خوزستان توركم

باخ او تنگستانین اوغلانلارینا

باخ خزر ساحلی توركمان توركم

گیروه كوردستانا پای اولموشسا

آتمارام قزوینی تهران توركم

ایندی یاد اوغلو منه یاد دئمه­سین

گؤزو گؤرسون بوتون ایران توركم

تولكو آسلان ایله گیرمز ساواشا

گئری دورسون كی من اسلان توركم

بیر قیغیلجیم اونا اود پوسگورسم

دودمانی  گئدر آسان توركم

عاقل انسان كی دولاشماز توركه

یوخسا من یوردونا وولكان توركم

وطنیم یادلارا یورد اولمایاجاق

وطنیم ایچره خورامان توركم

یوردومون تورپاغینا گؤز تیكنی

ائله­ین گونده هراسان توركم

وطنیمدیر وطنیمدیر وطنیم

وطنیم آذربایجان توركم

 سنین سن‏لیگینی سنده قورویان

آتالاردان قالمیش آنادیلین‏دیر

 گؤزل‏لیك ایسترسن وار گؤزل‏لیگی

درین‏لیك ایسترسن بو دیل درین‏دیر

 شیرین‏لیك ایسترسن شیرین‏دیر بالدان

اسرك‏لیك ایسترسن اسرك اولورسان

 دویغو افاده ‏سی بو دیلده آسان

سهو ائدیر كیم دئسه بو دیل چتین‏دیر

 سفره‏ سی نعمتی اولان دیلیمین

شاعر طبیعتی اولان دیلیمین

 دیل‏لرجه قدرتی اولان  دیلیمین

نه ‏دن سه اوجاغی بئله سرین‏دیر

  سرین اوجاغینا اودون اولاریق

عالمه بیر یئنی هارای سالاریق

 اونسوز خزل‏لنیب اونسوز سولاریق

قوشلارین دا سسی اونسوز حزین‏دیر

 منیم‏له آغلاییب - گولمك ایسته ‏سن

گؤزومون یاشینی سیلمك ایسته ‏سن

 كؤنلومون سیررینی بیلمك ایسته ‏سن

آنامین دیلینده گل منی دیندیر.

دانیشانلار بیر-بیر سوسور، دانیشدیقجا سازیم منیم

مجلس اهلی قیشدان چیخیر، چون دانیشیر یازیم منیم

توخوناندا مضراب تئله، روحوم گئدیر اسگی ائله

دورنالاریم قاتارلانیر، قاققیداییر قازیم منیم

بو ساز بیر عالیجنابین، عزیز وجودون سازیدیر

كیمسه نی مأیوس ائیله مز، قلبه اومودون سازیدیر

اوزانلاردان بیزه گلن دده م قورقودون سازیدیر

ایلاملاردا «شكیل»لیدیر، اورخونلاردا «یازی»م منیم

خسته قاسیمدا دیللنیب، «غربتی»سین چالیب غریب

«یانیق كرمی»ده كرم آیریلیقلاری سؤیله ییب

آلی-علعسگردن گلیب، عدالته اولوب نصیب

چنگیزین بارماقلاریندا اوزه چیخیر نازیم منیم

دونیالارا اون وئریرم، سرحدلری آشیر سسیم

سسیم بیر ایلاهی سسدیر، بو سس منیم مقدّسیم

دالغالانیر بایراغیمدا اسیر بو سس اسیم-اسیم

وارم بودور اوتانمارام، چوخوم منیم، آزیم منیم.